सरकार फेरिए पनि चीनका राष्ट्रपतिको नेपाल भ्रमण नरोकिने

abcd

चिनियाँ राष्ट्रपति सी जिनपिङ 

काठमाडौं: नेपालमा हालै भएको सत्ता परिवर्तनका कारण चिनियाँ राष्ट्रपति सी जिनपिङको यही वर्ष हुने भनिएको नेपाल भ्रमण प्रभावित नहुने चीनका एक प्रभावशाली विज्ञले बताएका छन् । हाल नेपाल भ्रमणमा रहेका चाइना इन्स्टिच्युट अफ इन्टरनेसनल कन्टेम्पोररी इन्टरनेसनल रिलेसन्स (सीआईसीआईआर) का अध्यक्ष जी चियेले चीन अध्ययन केन्द्रद्वारा सोमबार साँझ आयोजित कार्यक्रममा यस्तो बताएका हुन् । सीआईसीआईआर चिनियाँ राष्ट्रपति सी जिनपिङ नेतृत्वको स्टेट काउन्सिल मातहत रहने बौद्धिक संस्था हो ।

‘यही वर्ष हाम्रा राष्ट्रपतिको नेपाल भ्रमण हुनेछ र यसबाट दुई देशबीचको सम्बन्ध अझै प्रगाढ हुनेछ’, उनले भने । केपी ओली नेतृत्वको सरकारको बहिर्गमनपछि माओवादी केन्द्रका अध्यक्ष पुष्पकमल दाहाल नेतृत्वमा बनेको नयाँ सरकारको कार्यकालमा चिनियाँ राष्ट्रपतिको भ्रमण नहुने हो कि भन्ने आशंका रहेका बेला जीको यस्तो भनाइ आएको हो ।
दुई महिनाअघि नेपाल भ्रमणमा आएका चिनियाँ सेनाका उपप्रमुखले चिनियाँ राष्ट्रपतिको नेपाल भ्रमण यही वर्ष हुने जानकारी नेपाल सरकारलाई गराएका थिए । असारमा सम्पन्न परराष्ट्रसचिव शंकरदास बैरागीको चीन भ्रमणमा समेत चिनियाँ राष्ट्रपतिको भ्रमणले प्राथमिकता पाएको थियो ।
पूर्वप्रधानमन्त्री ओलीको चीन भ्रमणमा भएका पारवहन, यातायात सम्झौतालगायत अन्य सम्झौतालाई नेपालले इमानदार रूपमा कार्यान्वयन गरेको खण्डमा चिनियाँ राष्ट्रपतिको भ्रमण हुनेमा सरकारी अधिकारी समेत विश्वस्त देखिएका छन् ।
दुई मिनेटको मन्तव्यका क्रममा चिनियाँ विज्ञ जीले नेपाल—भारत सम्बन्ध सुदृढ होस् भन्ने चीनको चाहना रहेको बताए ।
‘भारतसँग असल सम्बन्ध राख्न चीनले नेपाललाई प्रोत्साहित गर्दै आएको छ’, उनले भने । तर उनले हालैका वर्षमा नेपाल र भारतबीचको द्विपक्षीय सम्बन्धमा आएको तिक्तताबारे कुनै टिप्पणी गरेनन् ।
जीले आफ्ना चाहना र मागबारे स्पष्टसँग चीनसमक्ष अभिव्यक्त गर्न नेपाललाई आग्रहसमेत गरे । उनले भने, ‘नेपालले स्पष्टसँग आफ्ना माग र चाहना राखेको खण्डमा त्यसलाई पूर्ति गर्न चीन सदैव तयार छ ।’

Follow Us

Facebook

Twitter

© Copyright by NayaBato
सम्पर्क [email protected]
Scroll Up