‘ब्यारेकबाटै हतियार हरायो’ भनेपछि सेनामा खैलाबैला, मुख्यालयबाटै छानबिन

1234

धनगढी : नेपाली सेनाको सुदूरपश्चिम पृतनाबाट एसएमजीसहित दुईवटा गोली भरिएका म्यागेजीन हराएपछि सेनाभित्र खैलाबैला मच्चिएको छ ।दिपायलमा सुरक्षार्थ खटिएको गरुडदल गणको एक टुकडीको हतियार शुक्रबार हराएको बताइएको छ । तर सेनाले यसको आधाकारिक पुष्टि गरेको छैन ।
यसबारेमा बुझ्न खोज्दा नेपाली सेनाका प्रवक्ता सहायकरथी ताराबहादुर कार्कीले अन्नपूर्ण अनलाइनसँग भने, ‘अहिले नै हराएको भन्न मिल्ने अवस्था होइन। मिसपेलेस पनि हुनसक्छ । यसबारेमा हामी छानबिन गरिरहेका छौं। एकिन भएपछि के भएको हो भनेर हामी जानकारी दिन्छौं ।’
हतियार हराएपछि छानबिनका लागि नेपाली सेनाको एक टोली हेलिकोप्टरमार्फत दिपायल पुगेको स्थानीय स्रोतले बताएको छ । पृतनाबाट सटमेसिन गन (एसएमजी) एक थान र त्यसमा लोडेड दुई वटा म्यागजिन हराएपछि छानविनका लागि टोली दिपायल पुगेको हो ।
हतियार र गोली हराएपछि सुदूरपश्चिम पृतनामा आन्तरिक छानबिन भइरहेको छ । यस बिषयमा सुदूरपश्चिम पृतनाका सैनिक अधिकारीहरु केही बोल्न चाहिरहेका छैनन् ।
हतियार भण्डारण गर्ने कोतको ताला तोडिएको अवस्थामा भेटिएको र शुक्रबार हतियार हराएको खुलेको थियो । हतियार गन्दा एसएमजी फेला नपरेकाले छानबिन सुरु भएको सैनिक स्रोतको दाबी छ ।

तर हतियारसहित सैनिक जवान फरार भएको खबर बाहिर आएपनि सेनाले उक्त कुरा झुटो भएको र आफनो कुनै पनि सैनिक जवान फरार नभएको दाबी गरेको छ । सैनिक अधिकारीसँग यस बिषयमा बयान लिने तथा सोधपुछ गर्ने काम भईरहेको स्रोतले बतायो ।
सुदूरपश्चिमका पृतनापति उपरथी विनोदकुमार श्रेष्ठ केही हप्तादेखि विदेश भ्रमणमा भएकाले हतियार हराएको बिषयलाई लिएर कैलालीको अत्तरिया स्थित ५ नम्बर बाहिनीका पाँच बाहिनीपति सहायकरथी रामशरण कार्की छानबिनका लागि सुदूरपश्चिम पृतना पुगेका छन । कार्की निमित्त पृतनापतिको जिम्मेवारीमा थिए । अन्नपूर्ण पोस्टमा खबर छ

Follow Us

Facebook

Twitter

© Copyright by NayaBato
सम्पर्क [email protected]
Scroll Up